LIFE | الحياه

سلسلة العودة إلى الدراسة الجزء الأول |Back To School part 1

سبتمبر 3, 2015
بسم الله الرحمن الرحيم
يسعد نهاركم جميلاتي
اليوم راح نبدأ السلسلة الي وعدتكم فيها على الانستقرام و هي #سلسلة_العوده_للمدارس . و اعتذر عن تأخري ، والي كان غصب عني بسبب عطل في لابتوبي و اخيرا قررت انزل الموضوع بالايفون عشان اتأخر عليكم اكثر من كذا ، فبجد مررره سوري ، المهم نبدأ
بسم الله : 
السلسلة عباره عن أربع مواضيع:
١- خطوات التفوق في الدراسه .
٢- روتين الصباح و مكياج الدوام .
٣- وجبات فطور صحيه و سريعه .
٤- تنسيقات للجامعه و للمدرسه .
خطوات التفوق في الدراسة :
١ – تنظيم الوقت.
أول شيء النوم المبكر . ايوه بالضبط نكون دجاااج و ايشبهم الدجاج !! محلاهم وكل الناس تُحبهم و أكبر دليل الزحمة الي نشوفها عند البيك !!
ثاني شي معلومه كلنا عارفينها أن كل الناس متساويين في نفس الوقت كلنا يومنا ٢٤ ساعه ، مع ذلك نلاحظ شخص ناجح وأخر فاشل مع ان الوقت ثابت ، السر هنا هو تنظيم الوقت !
عشان كذا من الأن نبطل نقول أنا نفسي اعمل كذا و نبدأ نقول أنا حأبدأ من الأن ! وبالاصح ابدئي من الأن .
و أول خطوة راح نعملها هي أننا ننظم كل شي حولينا . نظمي غرفتك ، خصصي مكان للمذاكره ، حلو يكون عندك مكتب تذاكري عليه ، تحطي قدامك لوح تلزقي عليه ستكرات عن الأعمال الي ناويه تنجزيها ، أو عن مواعيد تسليم التكليفات و البحوث المطلوبه منك !
خصصي لك دفتر تاخذيه معك كل يوم للمدرسه أو الجامعه ( هو عباره عن منظم للدراسه ) قسميه بأي طريقه تحبيها ، مثلاً :
أول صفحه خليها ستكرات تكتبي فيها اهم المواعيد : موعد امتحان معين ، موعد تسليم بحث ، موعد تسليم تكليف ،..،..الخ .
بعد كذا صفحة للجدول و صفحة تقويم مثلا و .. و نسقيه و حطي لمساتك عليه عشان تحبيه اكثر و تتحمسي و اعملي صفحات تحفيزيه و فواصل بالدفتر تحفزك وتحمسك وتدفعك للانجاز والنجاح ، صور وعبارات تفاؤليه وتحفيزيه، أنا مره أحب فواصل الكتب لأني اقرأ واعشق الكٌتب فأعمل فواصل خاصه فيني اكتب فيها عبارات وصور احبها ، فلو حابين انزلكم طريقتي في عمل الفواصل  و انزل موضوع في المدونه عنها اكتبولي في التعليقات  .
وأيضاً للناس الي تحب تستخدم جوالاتها اكثر من الدفاتر فيه تطبيقات مره حلوه ومفيده جربوها وادوني رايكم مثلا :
تطبيق myhomework موجود في الأبستور ، هو عباره عن بلانر للدراسه ،يساعدك في تنظيم وقتك للدراسة و تنظيم أوقات الامتحانات وتسليم الواجبات 
و هو مجاني  
كمان في تطبيق اسمه: class timetable
٢- الانتظام وقت الدوام .
نقطه مهمه المثابره خلي وقت للوناسه ووقت للجد والاجتهاد ، يومك بالمدرسه ركزي فيه بالدروس ولاتغيبي ولا تكنسلي حضور محاضرة بتاتاً ، حاولي تجلسي قدام مو صروري أول صف لا المهم بالصفوف الاماميه لأن ورى دايم في ناس تقرقر و تشتت انتباهك ، فتركيزك يقل . كمان قدام بتكوني اكثر تفاعل مع استاذتك ، بالتالي راح تأخذ عنك انطباع كويس وهذا بصالحك .
٣- تقسيم المواد الدراسيه والمذاكره المنتظمه.
ذاكري أول بأول ، لا تسوفين و كل ما ذاكرتي جزئيات قصيره على مدى الاسبوع بترسخ بمخك وماراح تنسيها ابد عكس الي يراكم ويسوف ويجي ليلة الامتحان بيذاكر كل شي ! وقتها بتحسي الوقت قصير والماده دسمه و بتتوترين وتكرهين ابو المذاكره ، ووقتها بدل ما تركزين بالمذاكره بالاصح المراجعه لمذاكرتك السابقه والمجزئه راح تتندمين وتقولين ليتني وليتني!!!
طريقة المذاكره :
في طرق كثير للمذاكره منها :
١-  أنك تقرأ الدرس ككل بشكل عام ، تأخذ فكره عامه عنه ، بعد كذا ترجعي تقرأيه بتمعن و بتركيز عشان تستوعبي بقيه الأفكار فيه .
٢-طريقة أٌخرى وهي تقسيم الدرس خاصة لو كان طويل وتحاولي تربطي بعد كذا الأفكار ببعض !
و كمان طريقة الاختصار مثلا عندك زي مادة التاريخ أو الأدب مليانه معلومات لو عندك جمله مثلا:
أبوبكر محمد بن يحيى بن زكريا الرازي  عالم وطبيب فارسي (ح. 250 هـ/864 م – 5 شعبان 311هـ/19 نوفمبر 923 م)، ولد في مدينة الري. وهو (أحد أعظم أطباء الإنسانية على الإطلاق) كما وصفته زجريد هونكه في كتابها شمس الله تسطع على الغرب حيث ألف كتاب الحاوي في الطب ..الخ 
 
يصير تختصرها كذا :
أبو بكر الرازي ، عالم و طبيب ، فارسي ، الري ، ٣١١هـ ، ٩٢٣م .أنا اشوف هذي الطريقه حلوه خاصة للمواد الدش وانا كنت اتعب من الحفظ كوبي مااعرف ،فهذي الطريقه جيده اتمنى تفيدكم . 
ومن الكتب الجيدة التي تنفع في تَحصيل النجاح: كتاب للدكتور (أكرم رضا): “إدارة الذَّات دليل الشباب إلى النجاح“، كتاب سهل ومشوق .
 
 
اتمنى اكون افدتكم ولو بالقليل ، لو عندكم أي اضافات  اكتبوا في التعليقات ، لو تعرفوا برامج حلوه ممكن تفيد الطلاب خاصة في الجالاكسي ( سامسونج) ياريت تشاركونا ، نستفيد منها !
في حفظ الرحمن
Xoxo
للتواصل معايا :
انستقرام : jollza
ايميل: add.jollza@gmail.com

You Might Also Like

No Comments

Leave a Reply

UA-71620286-1 Top